Силъэпкъы ч1ыгуищэу мэпсэу:
Щэрджэс, Къэбэртай, Адыгей.
1эк1ыбыми щы1эхэр бэхэу
Тич1ыгум гочыгъэшъы, уей!
Зы лъэпкъыр пчъэгъац1эу зэтрафы.
Гощыгъэу, фэшъхьафэу зэхафы.
Л1эш1эгъум нэк1убгъо ш1уц1эу
Фэхъугъэ Кавказы заом
Къелъытэ адыгэр коцыцэу,
Ишъоф ипхъыхьагъэу тарихъым.
Гууз, зэхэшъоха, лъэпкъэгъухэр.
Бгъэжъ джадэм пыдзагъ ибыбын.
Къэнагъэу адыгэхэм апсэхэр
Хих пэнэу къэсыгъ пчыпыджын.
Пачъыхьэ аслъаным и1анэ
Къелыгъэуи къыдзрэ шхынныкъор
Зэхатхъэу ч1ып1эпщхэр тебанэ —
Аслъаным фикъугъ зэрэшъуфэхъугъэр.
Адыгэм гумахэр ыш1агъэп.
«Нан» чатэм ыч1эгъы щи1уагъэп.
Щэрджэс хэку ным фэбэнагъэх,
Шъхьафитэу щы1энхэм ежагъэх.
Лъы щычъэу, шъхьэ щыгъэт1ылъэу,
Тятэжъхэр Кбаад щыфэхыгъэх.
Джы ахэм ашъхьагъ теубгъуагъэу
Олимпы джэгук1эхэр к1уагъэх.
Тятэжъхэмэ яхьэдэ къупшъхьэхэм
Сыдэу тепхьашъущт шы къэгъачъэр,
Зэпачъэр, зэбэныр. Шъхьак1охэм
Агъэгупсэфынэп л1агъэхэр.
Хьадагъэм ипчэгу джэгу щаш1ырэп.
Псэк1одмэ гупсэф агъотынэп.
Амакъэ л1эш1эгъу закъоп-
Хьакъышхом пыипсэр хэк1ыщтэп.
Блэк1ыгъэ Кавказы зэошхом
Тикъошхэр ыфыгъ Истанбылым.
Къытыным фимыт усэк1ошхом
Апэк1эк1ыгъэр. Тхьам еш1ых къабыл.
Пачъыхьэм ы1эхэр к1ыхьых.
Хэчъыерэп джырэк1и ихьэхэр.
Чэщ-мафэм ахэр пэ1утых
Ч1агъэбы ыч1эгъы хъыягъэр.
Ныдэлъфыбзэр джыри бзэмы1у.
Фэежьэп зиери 1уабзэу.
Сабый ибэ ар ныкъу,
Къефызы ик1уак1э гъыбзэу,
Шъэм голъэу шъэныкъор ехъужьэу
Уеплъыжьмэ, тарихъыр блэк1ыгъ.
Адыгэ лъэпкъыр гуныкъоу
Зэрэугъоижьмэ ш1оигъу!
Щэрджэс хэку зэик1 зык1эхъопсрэр.
Тич1ыгу шъхьафитым тыфит.
Лъэпкъыр зэкъотмэ – зылъэшыр,
Онджэкъым, адыгэр ек1ужь!
Л1ыпц1экъо Ларис