Зы пкъым иувэу зы фэ къызытеуа жылэу, ищхьэ цlэ фlищыжыфу мы щlы хъуреижьым щыщыlэщ сыхалъхуауэ си Адыгэ лъэпкъыр. Сызэригушхуэр аркъудей мыхъуу зы гупсысэ мыин-мыцlыкlу хэсшыну сыхуопабгъэ яужьырейм а я жьантlапlэр ягъэпцlу ди унафэ ящlыну абы дэтlысхьэжауэ ди ипщэрагъукlэ къыткlэщlэс «унэфэщl» лъэпкъым я макъхэр зырагъэинрэ.
Сыт ди lуэхухэр, сыт щыщыlэр мы къекlуэкlхэм?
Зы lуэхугъуэ мынэхъиныр унагъуэ-лlакъуэцlэ lуэхуу сывгъэгъэув. Адыгэм бзылъхугъэр и гъафlэнщ и набдзэщ, зэхэгъэжи имыщI и унагъуэ нысэу къыщыришэм деж, хэти къыхэкlами, сытыбзэ lурылъми езым ейуэ, езым щыщу егъуври хабзэ ирещlэкl, егъэнысэ, щылъхуу тригъуатэри егъэадыгэ. Къыхыхьауэ щытми зыхищlыкlрэ къыгурыlуэмрэ хозагъэри и гъащlэр пса мэхъу, жылэ мэхъу, къупщхьэ мэхъу. Адыгэу, абы аткlэ уимыгъэлъыхъуэжу лъэпкъыжьу Хьэщхъуэжьхи зы урыс ныси ягъуэтт, ари я урыс жьантlапlи дагъэтlысхьэжт парламенту Налщыдж . Сыриукlытуи сотх адыгэм ди нысэу сытепсэлъыхьын хуейуэ къызэрыхъур, ауэ ар утыку къихьэу и псалъэкlэ адыгэр лъэпкъыу игъэпудын щыхъум жыlыпхъи щlапхъи къоунэху.
Си зыр
Хъункъым зыхэсым и унэцlэ «Хьэщхъуэжьыр» lуигъэкlуэтрэ и дыщым яцlэ «Егоровэр» жьы къепщэм зыдищlу зыфlищыжыну. Урысым имей унэцlэм ахуэдэу уриджэгуфыныр къемызэгъыу зыгуэрт. Арамэ гум игъэтlысхьи и дыщым япхъур хуегъэшэж !
Си тlыр
Лъэпкъыу узыхэсым уи псалъи уи унафи хумылъхьэ я лlыкlуэ уамыщlауэ . Хэтхауи, дгъэкlуауи сымыщlэт, Къэбэрдей къэралыгъуэ хасэм ди нысэм ди унафэ едгъэщlыну дэдмыгъэтlысхьэт. Дэ ди хабзэр ди бзэкlэщ зэрыгъэпсари екlурэ ещхьу и пщэрылъхэр егъэзащlэри, мыубзэщхъуу зытехуапхъэми трегъэзагъэ уигури уипсэри. Урысейр нобэкlэ хьэдэгъуэдахэу я унафэ щlыкlэми, зытращlыхь емыкlухэми бзэр дауикl хэмызэрыхьнт. Езыр ищхьи ипкъи ирокъуж, ищlэнури ещlэж !
Си щыр
Хъийм умыкl !
lуэхугъуэ нэхъ ину згъэlунут куэду къытхэзэрыхь хъуахэм, псом хуэмыду я цlэмрэ я фэмрэ имыхуэжу «дыурысщ» жызыlэхэм.
Лъэпкъыр вакъэ зэвым итщ, зэбгырыпхъащ гугъуехьыр и натlэу ипсоунымрэ и щыlэнымрэ пэлъэщ къудейщ. Тlасхъапlэу диlэр ( дэтхэнэ лъэпкъым хуэдэуи) нэрылъагъущи кыттепщхьауэ а къутэгъуафlэм деж тригъэпсауэ йоуэ лъэрыщlыкl дищlыну. Нэхъ лlыгъэ зиlэр шыщхьэмыгъазэу поув мыдрейхэм хэти зиудыгъущ, хэти зыдещl дэджэгуфын игугъэу, хэти дзэлыфэр хуетl, мэджэгухэ . Урысми къэзэрыдэджэгухэри, зэкъызэрызыдащlри фlыдыддэу ещlэри зымыщlэжхэр яфlэщ хъужауэ утыкум джэрэзу къинахэрщ.
Лlо аткlэ ?
Я макъхэр ягъэину, зырикl емылъэlурэ дапlыну, дагъэунэну пщэрылъ зыщащlыжауэ утыкум тхуимыкlыжхэми, урысщlэкъухэми вжызоlэ зыкlи ди lуэху зэрызыхэмылъыр.
Зэпэщхьэхуэрэ ди псалъи, ди гупсыси, ди псоукlи, ди lуэху гъэпсыкlи, ди щхьэ къырикlуэнури, дызэрыпсоунури, дызэрыщыlэнури ди щхьэкlэщ, ди гъупсысэкlэщ, ди хабзэкlэщ, ди бзэкlэщ !
Нокlуэ !
Щоджэнц1ык1у Альберт